Navigieren in Scuol

Subnavigation: Fracziuns

Sent

Ün cordial bainvgnü a Sent

Stabilimaints cun ün'architectura classicistica (Palazzi) dan a Sent üna taimpra tuot speciala. Blers Sentiners han vivü plü bod in Italia e vaivan sucess impustüt sco pastiziers. A chasa hana lura fabrichà lur residenza. Las culmainas cun stil baroc invezza han portà mansterans tirolais in Engiadina Bassa. Ellas existan bod be a Sent ed han nom perquai "culmainas da Sent". Ils da Sent nu chüran però be lur ierta istorica, els sun eir innovativs. Il label "cità d'energia" dà perdütta da quai. A Sent daja ourdvart bleras societats fich activas ed üna sporta culturala multifaria. La populaziun s'indentifichescha fermamaing culla lingua rumantscha e's dà gronda fadia dad integrar linguisticamaing ils nouvs abitants sco eir ils giasts.

Il nom Sent

La derivanza da Sent es intscherta. Id existan teorias cha quist nom haja ragischs celticas. Plü probabel esa però cha Sent saja paraint cul nom local Senna chi's chatta in Lombardia. L'origen da quel nom es ün pled preroman incuntschaint.

Ün documaint da l'on 930 nomna il cumün sco Vicus Sindes. Otras fuormas veglias sun p.ex. Sindes, Sinnes o Sins. Sent es il nom ufficial daspö il 1879.

La vopna da l'anteriur cumün da Sent

Descripziun: Sur trais collinas verdas as rechatta üna clav naira.

Motivaziun: La clav tira adimmaint l'anteriura baselgia da San Peder*. Las collinas simboliseschan il grip ingio chi's rechattan amo restanzas da la müraglia ed il clucher.

Culuors dal cumün: nair-alb-verd

*La baselgia d'eira consecrada a l'apostel Petrus, la clav es ün da seis attributs.

Cifras e fats sur dad Sent

  • Parts da la fracziun

    • Sent
    • Crusch
    • Sur En
    • Sinestra
    • Zuort

  • Surfatschas

    Surfatscha totala 11’172 ha
    Terrain agricul 34.1%
    God e frus-chaglia 13.1%
    Terrain abità 0.54%
    Surfatschas improductivas 52.2%

  • Otezzas sur mar

    Cumün 1’430 m
    Punct il plü ot (Piz Tasna) 3’179 m
    Punct il plü bass (En in vicinanza da Tramblai) 1’099 m

  • Populaziun

    Abitants 804
    Persunas cun dret da vuschar 624

  • Linguas

    Rumantsch 66.2%
    Tudais-ch 26.6%
    Otras linguas 7.2%

    Las pertschientualas as referischan a la lingua principala. Tuot ils Rumantschs san duos o plüssas linguas. 

  • Confessiuns

    Evangelic-refuormà 59.8%
    Catolic-roman 17%
    Otras religiuns e persunas sainza confessiun 23.2%

  • Economia publica

    Persunas occupadas tenor sectuors
    1.  Agricultura e silvicultura 16.3%
    2. Industria e mansteranza producenta 35.4%
    3. Servezzans 48.2%