Navigieren in Scuol

Subnavigation: Fracziuns

Tarasp

Ün cordial bainvgnü a Tarasp

I vain dit suvent cha'l turissem da bogns in Engiadina Bassa saja nat a Tarasp. Aint illa büvetta istorica sper l'En s'han inscuntrats ils giasts, la fin dal 19avel e'l principi dal 20avel tschientiner. Tanter els d'eiran blers exponents da l'aristocrazia, da l'economia e da la cultura. Tarasp nun es ingün cumün cumpact, dimpersè cumpiglia 10 fracziuns sparpagliadas. Vulpera, la plü gronda, ha mantgnü seis caracter dal "fin de siècle", dispuona però d'ün'infrastructura moderna pel turissem e da bleras sportas pel temp liber. Il chastè, l'insaina da Tarasp, as vezza da dalöntsch. El fa – daspö sia renovaziun al principi dal 20avel tschientiner – üna bella parada sur il Lai da Tarasp.

Il nom Tarasp

Id es fich probabel cha'l nom Tarasp deriva da l'expressiun latina "terrae asprae" (= terra crüja).

La vopna da l'anteriur cumün da Tarasp

Descripziun: La vopna es trapartida verticalmaing. Aint illa part schnestra (gelgua) as rechatta üna crusch latina da culur cotschna, aint illa part dretta (blaua) ün arch San Martin da culur gelgua e cotschna.

Motivaziun: Il cumün ha surtut la vopna da la famiglia da Tarasp chi'd ha vivü dürant il 11avel e 12avel tschientiner. Plüs commembers da quista famiglia s'han partecipats vi d'üna cruschada e vi da pelegrinadis vers Gerusalem. Perquai muossa lur vopna üna crusch. L'arch San Martin simbolisescha la colliaziun tanter Dieu e'ls umans, però eir la grondezza da Dieu.

Culuors dal cumün: cotschen-gelg-blau

Cifras e fats sur dad Tarasp

  • Parts da la fracziun

    • Aschera
    • Avrona
    • Chants
    • Chaposch
    • Fontana
    • Florins
    • Sgnè
    • Sparsels
    • Vallatscha
    • Vulpera

  • Surfatschas

    Surfatscha totala 4’690 ha
    Terrain agricul 12.3%
    God e frus-chaglia 34.6%
    Terrain abità 0.94%
    Surfatschas improductivas 52.1%

  • Otezzas sur mar

    Cumün 1’403 m
    Punct il plü ot (Piz Pisoc) 3’173 m
    Punct il plü bass (En, sboccadüra da la Clemgia) 1’179 m

  • Populaziun

    Abitants 228
    Persunas cun dret da vuschar 159

  • Linguas

    Rumantsch 34.7%
    Tudais-ch 47.2%
    Otras linguas 18.1%

    Las pertschientualas as referischan a la lingua principala. Tuot ils Rumantschs san duos o plüssas linguas. 

  • Confessiuns

    Evangelic-refuormà 23.2%
    Catolic-roman 41.2%
    Otras religiuns e persunas sainza confessiun 35.6%

  • Economia publica

    Persunas occupadas tenor sectuors
    1.  Agricultura e silvicultura 3.2%
    2. Industria e mansteranza producenta 7.3%
    3. Servezzans 89.5%