Areal Trü: stadi actual ed ulteriur proceder

L'areal Trü es daspö decennis ün lö da temp liber e d'inscunter important per la populaziun ed ils giasts da Scuol. Bleras generaziuns collian cun quai algordanzas persunalas – dal bogn avert sur l'ir culs patins e'l curling fin al sogiuorn cumünaivel sün l'areal. A la radunanza d'orientaziun dals 14 settember ha la suprastanza cumünala infuormà davart il stadi actual da l'areal Trü e l'ulteriur proceder. Dürant la stà 2026 han las examinaziuns tecnicas muossà cha la platta da betun existenta e las lingias da l'implant da sfradantar chi passan in quella nu pon plü gnir dovradas in möd sgür per la gestiun d'inviern da fin qua. Implü sun parts essenzialas dals indrizs tecnics antiquats ed il cumpressur da l'indriz existent es crodà oura. Investiziuns plü grondas i'l implant dad hoz nu fan perquai plü sen.
 

Inviern 2026/27: sporta da glatsch provisorica a Gurlaina

Per l'inviern chi vain nu vain realisada ingüna plazza da glatsch sün l'areal Trü. Sco soluziun transitoria esa previs da spordscher a Gurlaina ün glatsch natüral. Cun quai dess gnir pussibiltà inavant da giovar a curling e patinar. Al listess mumaint as poja trar a nüz sinergias culla halla da glatsch existenta e l'infrastructura da quella. Davo la stagiun d'inviern vegnan evaluadas las experienzas e servan sco basa per l'ulteriura planisaziun da la sporta da glatsch.
 

Gestiun da stà Trü

L'areal Trü dess eir dürant la fasa da planisaziun star inavant a disposiziun a la populaziun ed als giasts. Per las prosmas stagiuns da stà vegnan examinadas soluziuns transitoricas per cha la gestiun possa gnir manada inavant cun investiziuns plü pitschnas pussiblas.
 

Co vaja inavant cul areal Trü?

La situaziun actuala spordscha la schanza da contemplar da princip l'avegnir da l'areal Trü. Il böt es da til sviluppar inavant sco lö d'inscunter e da sogiuorn attractiv e public, e quai resguardond ils differents bsögns da populaziun, giasts, societats e gestiuns. Sper sportas d'aua e da temp liber vegnan examinadas eir ulteriuras ütilisaziuns pussiblas da l'areal. Premissas importantas sun ün’ütilisaziun sur l’inter on, sinergias tanter las differentas sportas sco eir cuosts d'investiziun e da gestiun supportabels. Il cumün elavura per quai insembel cun persunas specialisadas differentas pussibiltats pel svilup futur. Decisiv es ch'üna soluziun futura nu saja be attractiva e radschunaivla a lunga vista, ma eir finanzialmaing realistica e supportabla pel cumün. Davart ils prossems pass e l'ulteriur stadi da planisaziun orientescha il cumün cuntinuadamaing.