Decisiuns chi pertoccan a persunas privatas o ad affars na amo serrats giò nu vegnan publichadas.
 

Allianza d’impostas Scuol – Valsot

Tenor il rendaquint 2025 da l’allianza d’impostas Scuol – Valsot resulta ün plü grond vanz co quai chi d’eira gnü büdschetà.
 

Survaglianza visuala (video) pro’l lö da ramassamaint d’immundizchas a Vulpera

Pro’l lö da ramassamaint d’immundizchas a Vulpera vegna adüna darcheu deposità s-chart chi nu tocca là (p. ex. roba bloccanta etc.) o sachs nairs ed i regna ün dischuorden. Las prescripziuns per ün allontanamaint correct da las immundizchas nu vegnan tgnüdas aint.

La suprastanza cumünala decida da far ils pass toccants per pudair montar üna survaglianza visuala (video) pro’l lö da ramassamaint d’immundizcha a Vulpera.
 

Vias champestras – müdamaint pel trafic motorisà

LAI NAIR
Ultimamaing ha il cumün surgni bleras reclamaziuns a reguard ils veiculs motorisats chi traficheschan fin sül Lai Nair. Tenor ils permiss chi vegnan miss oura pon ils veiculs ir fin sül Lai Nair per s-chargiar oura persunas o eir material, ston però lura davo parcar ils veiculs giò sün via süls parkegis. Quai nun es però il cas, adüna inavant sun veiculs sül Lai Nair. Per proteger la fauna e flora da quist lö esa important d’introdüer ün scumond pel trafic motorisà pels tragets chi mainan fin sü pro’l Lai Nair.

FONTANA SURA - AVRONA
Eir sül traget Fontana Sura - Clüs Sura - Avrona, chi’d es pel mumaint eir transibel pel trafic motorisà dess gnir introdüt ün scumond chi vaglia dürant il di tanter las 09:00 a bunura fin las 20:00 la saira. Quist traget es fich popular per peduns e velocipedists. Pel trafic motorisà daja la pussibiltà da rivar fin Avrona lung la via Sot Ruinas.

VAL PLAVNA
Implü dess eir gnir introdüt ün scumond total pel trafic motorisà da las 00:00 fin las 24:00 per la Via da Plavna tanter God Plan - Resgia Plavna - Chant dal Cuosp. Quista via es fich stretta e perquai privlusa per cruschar cun oters veiculs a motor e cun sviar oura peduns e velocipedists. Eir esa in blers lös il privel cun crodada da crappa e costas chi sglischan. Eir quia es datta la pussibiltà cha’l trafic motorisà po sviar sur Vallatscha - Chant dal Cuosp fin illa Val Plavna. Quista via d’eira gnüda fabrichada oura per dovrar sco via principala ed es fich bain transibla per tuot il trafic.

Tenor artichel 9 da la ledscha davart l'adöver da las vias champestras e las vias da god cun veiculs a motor po la suprastanza cumünala, per evitar svilups na giavüschats sün singulas vias,

• colliar permiss cun cundiziuns restrictivas, impustüt concernent ils temps da viadi admiss o restricziuns sün tschertas vias e/o tragets
• relaschar cundiziuns restrictivas per tuot ils viadis tenor art. 3 e 4 cun ün’ordinaziun impustüt concernent ils temps da viadi

La suprastanza cumünala decida d’introdüer ils scumonds manzunats survart a partir da subit.
 

Zonas da funtanas – Munt Ardez – eliminaziun da las zonas da funtanas

Sü Mundaditsch existan actualmaing trais zonas da protecziun pella funtana. Tenor ledscha nu pon esser ingüns stabilimaints illa zona S1, oter sco infrastructura chi ha da chefar directamaing cul inchaschamaint, resp. culla funtana. Quai nun es però il cas, ultra da l'inchaschamaint d'aua as rechattan eir amo ulteriurs edifizis in quista zona. Ün da quels es la mundschaduoira da l’alp Murtera. Per pudair gestir inavant quista mundschaduoira e surdar quella insembel culla malgia a la corporaziun esa necessari d’eliminar quistas trais zonas da funtanas. Ün toc da la lingia es fingià distachada e pel provedimaint d’aua nu n’ha quista funtana plü ingün’importanza, neir na sco funtana da reserva.

La suprastanza cumünala decida d’eliminar las trais zonas da funtanas sü Munt.
 

Bigliets dal Vereina

In mincha fracziun esa pussibel da retrar bigliets dal Vereina, quai cun muossar la “carta cotschna”:

• Guarda: Butia Volg
• Ardez: Hotel Alvetern (quia as haja dafatta la pussibiltà da surgnir ils bigliets via WhatsApp)
• Ftan: Turissem Ftan
• Tarasp: Butia Tarasp
• Scuol: Turissem Scuol
• Sent: Turissem Sent

Pro’l servezzan d’abitants pon gnir retrat ils bigliets dal Vereina da lündeschdi fin venderdi dürant las uras da büro. Id es pussibel da postar eir per e-mail o per telefon ed ils bigliets pon sün giavüsch eir gnir tramiss per e-mail.
 

Infuormaziun iniziativa vaschinala antennas mobilas

Martin Sutter ha infuormà al capo davart ün’iniziativa vaschinala a reguard antennas per la telefonia mobila. Il böt da l’iniziativa es, cha dumondas per permiss da fabrica d’antennas dessan gnir suottamissas a la radunanza da vaschins e cha quella po decider in chosa. Tuot in tuot sun gnüdas insembel 59 suottascripziuns.
 

Recertificaziun dal label cità d’energia

Dal 2018 ha il cumün da Scuol pudü tour incunter per la prüma jada il label “cità d’energia” e uossa sta avant il seguond re-audit. L’uffizi d’energia e da trafic dal Grischun infuorma cha’l cumün da Scuol haja muossà sü dürant ils ultims quatter ons ch’üna politica d’energia perdüraivla saja importanta pel cumün. Las masüras previssas lascha suppuoner ün grà d’accumplimaint da raduond 67 %. Cun quai surpassa quel a las pretaisas minimalas da 50 % per bainquant. Impustüt vala per la partecipaziun al s-chodamaint a distanza üna gronda arcugnuschentscha. Cun quel esa pussibel da rimplazzar divers s-chodamaints d’energia fossila cun energia regenerabla.
 

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Urs Steinemann-Wüst, nouv s-chodamaint cun sondas geotermicas, parcellas 50371 e 52816, Chaposch 40, Ftan
• Helga Mayer-Windegger, rimplazzamaint da la terrassa existenta da lain e refar il tet, parcella 11155, Larschs, Sent

Scuol, 29 settember 2026
La suprastanza cumünala

Riassunt dal protocol