Decisiuns chi pertoccan a persunas privatas o ad affars na amo serrats giò nu vegnan publichadas.
 

Cità d’energia – deliberaziun dal program d’activitats

Dal 2018 es il cumün da Scuol gnü certificà cul label «cità d’energia» e dal 2022 ha quel pudü gnir recertificà. Il label vain actualisà successivamaing a las circunstanzas actualas e cuntegna sper temas d’energia eir temas generals dal svilup perdürabel. Il label sto gnir confermà mincha quatter ons i’l rom d’üna recertificaziun tras ün auditur resp. da la cumischiun da label da la cità d’energia. Cun quai sta quist on darcheu avant la prosma recertificaziun. Uossa es gnü stipulà il program d’activitats 2027 – 2030 per masüras e-politicas.

La suprastanza cumünala deliberescha il program d’activitats 2027 – 2030 per masüras e-politicas.
 

Legat à Porta – scumpart dal guadogn 2025

I’l documaint da fundaziun da dr. Stephan à Porta esa stipulà cha la fracziun da Ftan (anteriur cumün da Ftan) survegna üna donaziun dal resultat annual da la fundaziun. La Pro Ftan es respunsabla per impuonder quists mezs a favur da la fracziun da Ftan e da seis abitants.

La suprastanza ha da tour cogniziun minch’on dal scumpart dal guadogn net dal Legat à Porta.

Per decider schi vain aderi ad üna dumonda da contribuziun valan ils seguaints criteris:

• Cul intent chi vain sustgnü finanzialmaing stuvessa dar ün nüz direct ed immediat per Ftan respectiv pels abitants da Ftan. I vegnan promovüdas pustüt tuot las activitats chi contri­buischan ad üna vita da cumün activa (tanter oter activitats culturalas, socialas, sportivas e tradiziuns). Scha la qualificaziun correspuonda vegnan sustgnüdas tant las sortidas curraintas sco eir las investiziuns.
• Progets turistics pon gnir cofinanziats scha la premissa da basa da survart es accumplida.

Cun üna part da la contribuziun vain sustgnü il fabricat da la nouva chamonna da passlung Nuis-chel.

La suprastanza cumünala piglia cogniziun dal scumpart dal guadogn net 2025 dal legat à Porta. Quista contribuziun es ün fich grond sustegn pel cumün da Scuol, resp. per la fracziun da Ftan e la suprastanza ingrazcha fich a la fundaziun pel sustegn finanzial.
 

Cuorsa coppa mundiala da Snowboard – sustegn finanzial pel 2027

Daspö il 2018 vain organisada la coppa mundiala da Snowboard sün Prui. L'evenimaint vain predschà tant dals funcziunaris da SwissSki e da la FIS sco eir da las atletas e dals atlets per sia ota qualità. L'evenimaint po gnir realisà grazcha al sustegn dal cumün da Scuol, da las Pendicularas Scuol, dals numerus promoturs e dals voluntaris. Culla transmissiun illa televisiun es quai üna buna reclama per nossa bella cuntrada. Eir maina l’evenimaint ad üna plüvalur, quai cun pernottaziuns sco eir per las gestiuns turisticas.

La suprastanza cumünala decida da sustgnair eir la coppa mundiala dal 2027 quai però cun ün import plü redot co’ls ons avant.
 

Aboliziun da l’imposta d’aigna locaziun – introducziun d’üna imposta immobigliara speciala sün immobiglias secundaras

L’administraziun d’impostas chantunala ha infuormà, cha la procedura da consultaziun per la realisaziun da la müdada dal sistem da taxaziun sülla proprietà d’abitar e per l’introducziun d’üna imposta immobigliara speciala (imposta d’oget) vegn drivida probabelmaing principi da settember 2026. La consultaziun dess dürar fin principi da december. Ils cumüns vegnan lura invidats da tour posiziun davart il proget. Davo la terminaziun da la procedura da consultaziun deliberescha la Regenza la missiva per mans dal Grond Cussagl. Ella as sfadia da metter in vigur las müdadas da la ledscha al listess mumaint sco las disposiziuns dal dret federal pels 1. schner 2029.
 

Radunanza d’orientaziun als 14 settember 2026

Als 14 settember 2026 ha lö üna radunanza d’orientaziun a reguard il glatsch dal Trü e las structuras futuras da la scoula.
 

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Andrea Fischer Lötscher e Daniel Lötscher, sanaziun dal tet ed installaziun fotovoltaica, parcella 50085, Plaz 117, Ftan
• Cumün da Scuol, nouva canorta, parcella 1115, Via da la Dmura, Scuol
• Iwan Alexander Damerow, müdamaint da proget: renovaziun dal tet, müdamaint dal suost per autos ad üna garascha, ingrondimaint da la construcziun da schler, adattamaint da la fuormaziun da contuorn, parcella 20653, Sgnè 124, Tarasp
• Corporaziun d’alp Tavrü, ingrondimaint da la duscha dadaintvart, parcella 6257, Alp Tavrü / Scharl 980-a, Scuol
• Silvia Rüedlinger-Schmidt, rimplazzamaint dal reservuar, parcella 11309, Chünatsch, Sent

Scuol, 8 settember 2026
La suprastanza cumünala

Riassunt dal protocol