Subnavigation: Actual
Riassunt da la sezzüda da la suprastanza cumünala
dals 13 lügl 2026
Decisiuns chi pertoccan a persunas privatas o ad affars na amo serrats giò nu vegnan publichadas.
Directivas pel preventiv
La suprastanza cumünala as es consciainta chi’d es d’avair pisser da las finanzas cumünals. Las sortidas as han augmantadas dürant ils ultims ons ed eir in vista a las numerusas investiziuns chi stan avant esa uossa radschunaivel d’instradar masüras da spargn.
La suprastanza cumünala decida chi dessa gnir spargnà in mincha cas 8% pro’l sectur 31 (cuosts materials ed ulteriurs cuosts da gestiun) e scha pussibel in mincha singula partiziun il medem.
Center da cultura Nairs – cunvegna da prestaziun 2027-2030
La cunvegna da prestaziun culla Fundaziun Nairs scrouda la fin da quist on.
Actualmaing paja il cumün üna contribuziun annuala da 30 000 francs e la Corporaziun Energia Engiadina (CEE) üna tala da 60 000 francs (fondo dals 5 % dals cumüns concessiunaris).
Il chantun Grischun sustegna la Fundaziun Nairs cun 160 000 francs l’on.
La Fundaziun Nairs dumonda al cumün per prolungar la cunvegna da prestaziun pels prossems quatter ons (2027 - 2030).
La basa finanziala per la lavur dal Center da cultura Nairs fuorman las contribuziuns dal cumün da Scuol e da la CEE. I’l sen dal princip da subsidiarità sun quellas üna premissa centrala per surgnir las contribuziuns chantunalas sco eir dad ulteriuras instituziuns da promoziun e donaturas e donaturs. Las contribuziuns dal cumün, da la CEE e dal Chantun importan var ün terz dal preventiv total.
Grazcha a cunvegnas da prestaziuns da plüs ons s-chaffischan quellas üna sgürezza da planisaziun e pussibilteschan üna lavur cuntinuanta, orientada a lunga vista a bön da la regiun.
Var duos terzs dal preventiv vain finanzià cun donaziuns sco eir contribuziuns da fundaziuns ed ulteriurs partenaris da promoziun dadour il Chantun. Uschè tils grataja da surgnir considerabels mezs supplementars illa regiun e da cumplettar la finanziaziun regiunala da maniera efficazia.
La suprastanza cumünala repassa il sböz da la nouva cunvegna ed es perincletta cun quella. Il nouv punct da prestaziun (art. 4 al. d) > «Zusammenarbeit mit weiteren kulturellen Institutionen und Anbietern in der Region» salüda la suprastanza cumünala fich sco eir il fat cha la lingua rumantscha es manzunada cleramaint illa cunvegna da prestaziun.
Garanzia d’impraist a las Pendicularas Scuol SA
Als 17 december 2015 vaiva il cumün concess üna garanzia d’impraist a las Pendicularas Scuol SA per la nouva s-chabellera da ses persunas da Prui-Clünas. Da l’uffizi per economia e turissem dal Grischun es entrada als 24 gün l’infuormaziun cha l’impraist saja uossa gnü pajà inavo cumplettamaing uschè chi nu vain neir na plü dovrada la garanzia dal cumün. Cun quai pon gnir s-chassats eventuals imports per quista garanzia our da la contabilità da finanzas.
Permiss da fabrica gnüts concess da la direcziun
La direcziun resp. la suprastanza han concess ils seguaints permiss da fabrica:
- Martin Lauber Treuhand und Verwaltungen AG, müdamaint da proget: müdamaints interns ed augmaint da la terrassa vers südvest, parcella 2165, Schinnas Dadora, Scuol
Scuol, 28 lügl 2026
La suprastanza cumünala