Subnavigation: Actual
Riassunt da la sezzüda da la suprastanza cumünala
dals 26 mai 2026
Decisiuns chi pertoccan a persunas privatas o ad affars na amo serrats giò nu vegnan publichadas.
Rinch da maschinas – Rendaquint 2025
Il suprastant respunsabel preschainta il rendaquint 2024 dal rinch da maschinas intercumünal forestal. Quel serra cun ün guadogn da 91.60 francs quai pro entradas da 33'440 francs e sortidas da 22'348.40 francs. Il chapital agen importa per la fin da l’on 300 000 francs.
La suprastanza cumünala piglia a cogniziun il quint annual 2025 dal rinch da maschinas forestalas.
Realisaziun Sistem da controlla intern (IKS) - fasa 2
La prüma part da la digitalisaziun dal sistem da controlla intern (IKS) es fingià realisada cun success dal 2025. Davo il discuors culla ditta Curia ha quella inoltrà ün’offerta per la surlavuraziun d'ulteriurs process IKS (fasa 2) e lur transferimaint i'l dashboard IKS existent dal cumün da Scuol. Pro la decisiun positiva vegnan planisats ils pass correspundents. La realisaziun füss previssa pel Q4/26 fin Q2/27. Ils cuosts importan CHF 16'200.00.
Meglioraziun Ardez e Guarda – Surdatta da l’incumbenza büro executiv
Per manar tras la meglioraziun da las fracziuns Ardez e Guarda ha la suprastanza cumünala institui la cumischiun da meglioraziun e relaschà als 18 mai 2025 la ledscha da meglioraziun Ardez/Guarda (LdM). Als 4 lügl 2025 ha la cumischiun da meglioraziun gnü la prüma sezzüda. Quella ha servi per s'organisar ed as constituir, pel prüm inscunter cul collavuratur da l’uffizi d’agricultura e da geoinfuormaziun (ALG) chi accumpogna e sustegna la cumischiun, e per decider a reguard la procedura per tscherner il büro executiv.
La cumischiun s'ha decisa pella procedura selectiva. Quella vain applichada praticamaing pro tuot ils progets da meglioraziun plü gronds e vain eir racumandada dal ALG. Quista procedura prevezza 2 fasas: illa prüma pon büros chi accumplischan tscherts criteris annunzchar lur interess. Illa seguonda fasa pon ils büros determinats inoltrar lura lur offertas.
La cumischiun da meglioraziun Ardez-Guarda ha gnü ils 7 mai 2026 üna sezzüda ingio chi gnüdas examinadas las offertas per surdar las lavurs.
La valütaziun es gnüda fatta in considerond 40 % predsch e 60 % organisaziun dal proget.
Quella es gnüda fatta as basond süls criteris fixats illa documainta da submissiun. Gnüts resguardats sun ils seguaints criteris:
- Organisaziun dal proget
- Experienzas, cugnuschentschas particularas, comunicaziun,
- Realisaziun dal proget, termins
Sün proposta da la cumischiun da meglioraziun surdà la suprastanza cumünala l'incumbenza pel büro executiv per tuot la meglioraziun Ardez/Guarda al büro ARGE Donatsch + Partner / Geo Alpin SA, pel predsch offri da 2'594'609.70. Implü decida ella d'autorisar a la cumischiun da meglioraziun da stipular e suottascriver ils contrats bsögnaivels.
Ledscha da fabrica futura (MWA 2) – art. 26 ed art. 136
La cumischiun da planisaziun ha surlavurà tuot la ledscha da fabrica futura (MWA 2). Duos artichels dan adüna darcheu andit a discussiuns in connex cun dumondas da fabrica.
Art. 26 al. 4 ed al. 5
Quist artichel regla l’economisaziun dal spazi da fabrica (haushälterische Bodennutzung). L’alinea 4 regla l’otezza dal local per evitar «catedralas» ed alinea 5 regla co proseguir.
Extrat art. 26 al. 4 ed al. 5
4 | Die durchschnittliche Raumhöhe der Geschosse bei Neubauten, Wiederaufbauten, Ersatzbauten, Auskernungen, wesentlichen Umbauten und Erweiterungen darf 3.5 m nicht überschreiten. Die Ermittlungen der durchschnittlichen Raumhöhe erfolgt gemäss nachstehender Skizze.
5 | Baugesuche, welche dem Gebot des haushälterischen Umgangs mit dem Boden nicht genügen, werden zur Überarbeitung zurückgewiesen.
Art. 136 al. 3
Quist artichel regla la tematica da schlubgiar l’oblig dad abitaziuns principalas. Il fat cha illa prosma exposiziun publica nu saraja plü pussibel da cumprar liber quellas, fessa sen da decider a reguard quel artichel. Uschè po l’uffizi da fabrica dar infuormaziuns plü precisas.
Extrat art. 136 al. 3
3 | Die Umnutzung von kommunalen Erstwohnungen in Zweitwohnungen ist nicht gestattet.
La suprastanza decida dad introdüer ils artichels nomnats a partir da subit. Ils duos artichels surnomnats figüreschan a partir da subit sco dret futur e sun impegnativs.
Permiss da fabrica gnüts concess da la direcziun
La direcziun resp. la suprastanza han concess ils seguaints permiss da fabrica:
- Engadiner Kraftwerke AG, via d’access cun plazza da volver inverdida per l’ouvra idraulica Pradella, parcellas 1969, 2056, 1507, Pradella, Scuol
- Fundaziun Muglin da Ftan, nouv condot d’aua, parcellas 51419, 53196, 53497, 53260, Muglin, Ftan
- Kurhaus Val Sinestra AG, sanaziun dal tet plat da l’annex vers vest da l’hotel Sinestra, parcella 11528, Val Sinestra, Sent
- Engadiner Kraftwerke AG, via d’access e sanaziun da la punt, parcellas 6238,6241,6272, Pradella, Scuol
- Engadiner Kraftwerke AG, via d’access pel mantegnimaint dal batschigl d’egualisaziun Pradella, parcellas 1542, 1778, 6240, Pradella, Scuol
- StWEG Heinrich/Duschèn, nouv tschuffa d’üert, parcella 6196, Ils Chomps/S-charl 596, S-charl
- Melcher Stuker Natalia e Gerhard Stuker, müdamaint da proget; spostamaint ed adattamaint dal suost per autos, nouv mür e fuormaziun dal contuorn, parcella 500, Via da Ftan 2, Scuol
- Stecher-Fessler Claudia, nouva lucarna e müdamaint folia da tet, parcella 6234, Scharl 35, S-charl
- Conrad-Roner Barbla e Grazian, drenascha cun refar il soccal e culurir nouv il tet, parcella 4576, Larschs, 7550 Scuol
Scuol, 12 gün 2026
La suprastanza cumünala