Decisiuns chi pertoccan a persunas privatas o ad affars na amo serrats giò nu vegnan publichadas.
 

Rait electrica – taxa a favur da la comunità pel 2027

Tenor l’artichel 1 al. 2 da la ledscha d’energia dal cumün da Scuol dals 26 marz 2017 ha da fixar la radunanza cumünala minch’on la taxa per l’on davo, quai i’l rom tanter 0 e 4 raps per ura kilowatt.

Actualmaing inchascha il cumün üna taxa a favur da la comunità dad 1.5 raps pro ura kilowatt. Dal 2023 es entrà cun quai s-chars 637 000 francs e dal 2024 sun entrats 588 997.03 francs (conto 9502.4120.01). Dal 2021 importaiva la taxa 1,5 raps per ura kilowatt ed il cumün ha inchaschà uschè bundant 1,06 milliuns francs.

Las Ouvras Electricas d’Engiadina (OEE) han pretais cha’ls cumüns da Zernez, Scuol e Valsot resp. la EE Energia Engiadina pajan a partir dals 1. lügl 2016 la remuneraziun per l‘ütilisaziun da la rait per l’energia cha’ls cumüns retiran da terzs. La ElCom ha dat radschun a las OEE. Ils cumüns resp. la EE Energia Engiadina han trat inavant la decisiun davant il tribunal federal. Quel ha refüsà la protesta, tant cha’ls cumüns resp. la EE Energia Engiadina han da pajar a partir dals 1. lügl 2016 la remuneraziun per l’ütilisaziun da la rait. Ils cliaints dals cumüns da Zernez, Scuol e Valsot han da restituir uschè dürant trais ons (2022 – 2024) minch’on 2.7 milliuns francs a las OEE.

Per impedir cha l’augmaint dal predsch da forza nu saja massa grond pels cliaints esa gnü decis da la radunanza cumünala da redüer la taxa a favur da la comunità per ün mez rap ad 1 rap per ura kilowatt e quai per trais ons fin cha la remuneraziun per l‘ütilisaziun da la rait es restituida. Cun quella reducziun ad 1 rap per ura kilowatt ha il cumün var 324 000 francs damain entradas.

Las radunanzas cumünalas dals 28 gün 2021, dals 27 gün 2022, dals 3 lügl 2023 e dals 17 gün 2024 han decis da redüer la taxa a favur da la comunità per l‘on 2022, 2023, 2024 e 2025 per ün mez rap ad 1 rap per ura kilowatt. La proposta da redüer la taxa sün 0 raps chi’d es gnüda fatta a la radunanza cumünala dals 3 lügl 2023 ha fat naufragi.

Sün proposta da la suprastanza ha decis la radunanza cumünala dals 23 gün 2025 dad augmantar la taxa a favur da la comunità pel 2026 sün 1.5 raps per ura kilowatt, quai causa cha la restituziun speciala a l’OEE es finida.

La suprastanza cumünala decida da propuoner a la radunanza cumünala da restar eir pel 2027 pro 1.5 raps per ura kilowatt.

Ordinaziun davart la vendita da terrain cumünal ad interessents privats

Illa sezzüda dals 16 marz 2026 ha decis la suprastanza da stipular ün’ordinaziun davart la vendita da terrain cumünal ad interessents privats. In seguit sun gnüts preparats dal giurist cumünal ils detagls dals princips chi dessan valair.

L’intent da l’ordinaziun es quel da s-chaffir lö d’abitar pajabel per indigens culla vendita da terrain da fabrica.

La suprastanza approvescha l’ordinaziun davart la vendita da terrain da fabrica ad interessents privats. Implü deliberescha la suprastanza cumünala l’inserat per la vendita da la parcella 41693 a Guarda.

Explotaziun ed ütilisaziun dal material e la gestiun d'immundizchas

Las reservas d’explotaziun da material a Parnarsura a Sur En illa fracziun da Sent sun exaustas. Cun quai chi nu dà ingünas otras pussibiltats d’explotar il material in vicinanza, es l’Uina SA sco gestiunaria da l’implant da glera e beton obliada da transportar il material per part cun distanzas fich grondas fin al post da l’ouvra. La distanza tanter il lö d’explotaziun e l’implant da preparaziun es colliada cun dischavantags, saja quai per la gestiun, pel trafic, sco eir per oters motivs (contaminaziun da l’ambiaint; explotaziun elevada süllas vias cumünalas; conflicts cul trafic plan e mancanza da rendabilità). Pervi dals dischavantags relevants chi sun gnüts manzunats ed a reguard las investiziuns necessarias chi stuvessan gnir fattas ils prossems ons vi dals stabilimaints da gestiun as stoja metter fundamentalmaing in dumonda la cuntinuaziun dal manaschi a Parnarsura.

I’l rom d’ün proget esa previs d’examinar las pussibiltats per transferir l’implant da glera e beton in ün lö chi’d es eir a lunga vista persistent. In quist connex dessan eir gnir examinadas sinergias cun oters progets d’infrastructura chi sun planisats, per exaimpel cul spostamaint da la sarinera. Il concept dess lura gnir transferi aint il plan directiv regiunal per l’explotaziun e l’ütilisaziun dal material e gnir francà in möd impegnativ per las autoritats. Per far quistas lavurs lessa üna revisiun parziala dal plan directiv per l’explotaziun e l’ütilisaziun dal material e la gestiun d’immundizchas.

Our d’vista da la Regiun e dal cumün sto gnir perseguità chi existan plüssas dittas d’explotaziun da material activas illa regiun e chi sto gnir pussibiltà üna concurrenza güsta da predschs (impedir la posiziun da monopol). Cun crear las cundiziuns da planisaziun da basa e dischlochar l’implant da glera e beton da Sur En in ün lö cun avegnir po gnir prestada üna contribuziun importanta. Quist proget promouva eir il sustegn da l’economia da construcziun locala cun materials da construcziun regiunals e rinforza la sgürezza dal provedimaint. Per quist proget exista ün grond interess regiunal.

La suprastanza decida da propuoner a la Regiun d’adattar il plan directiv regiunal per l’explotaziun e l’ütilisaziun da material sco eir per la gestiun d’immundizchas. Apaina cha la revisiun parziala dal plan directiv vain inviada prevezza il cumün da far üna cunvegna da planisaziun culla Uina SA. Quella dess reglar ils dovairs e’l scumpart dals cuosts.

Vachas mamma e chans da protecziun

In üna sezzüda tanter la cumischiun agricula e la Tourismus Engadin Scuol Samnaun Val Müstair SA (TESSVM) esa gnü decis cha la TESSVM ramassa tuot las datas actualas sur da las vachas mamma ed ils chans da protecziun. Publichà vegnan quellas datas sün üna charta interactiva ingio chi’s vezza che pas-ch chi vain ütilisà in che temp. Il link vain actualisà prosmamaing sülla pagina-web cumünala (rubricas principalas).

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Verme Juan Carlos, nouv s-chodamaint cun sondas geotermicas, abodamaint dals annexs, ingrondimaint veranda e müdamaints interns, parcella 30209, Via Maistra 82, Ardez
• Center da sandà Engiadina Bassa, renovaziun da la chadafö, parcella 1119, Via da la Dmura, Scuol
• Pendicularas Scuol SA, ingrondimaint e sanaziun energetica dal stabilimaint da l’administraziun, parcella 960, Via da Ftan 495, Scuol
• Gruber Jovin, sanaziun dal tet e rimplazzamaint da la paraid, parcella 21513, Via da Plavna 46, Tarasp
• proFtan, c/o Ursula Kindschi, chamonna da passlung, parcella 52803, Via da Ftan 5-181A, Ftan
• Claglüna-Baumann Annetta e Peider, renovaziun dal prümaran e rimplazzamaint da la tschuffa da laina, parcella 32888, Craista Suttera 257, Ardez
• Cumün politic da Scuol, sanaziun da la via da maschinas, parcellas 30771 e 30740, Plan Plaz, Ardez
• Dermont-Stupan Aita, ingrondimaint da la chasa d’abitar i’l tablà, installaziun fotovoltaica sül tet da la lobgia, duos nouvas lucarnas i’l tet, parcella 10345, Curtin, Sent
• StWEG, rimplazzamaint dal s-chodamaint dad öli cun ün s-chodamaint da pellets, parcella 30171, Bröl 27, Ardez
• StWEG Munt Plan c/o Lehner Fiduziari, rimplazzmaint dal s-chodimaint dad öli cun sondas geotermicas, parcellas 50023 e 52743, Sainas, Ftan
• Felix-Marques Vera e Jon-Curdin, ingrondimaint i’l plan tet, nouva fanestra e sanaziun dal chamin, parcella 10498, Palüzot 30, Sent
• Widmer Stephan Herbert, sanaziun dal tet e nouv implant fotovoltaic integrà i’l tet dal tablà, parcella 192, Bagnera, Scuol
• Florinett Samantha e Roman, nouva pergola, parcella 586, Via da Pedra Grossa, Scuol
• proFtan, c/o Ursula Kindschi, nouvas lingias d’infrastructura pel center da passlung, parcellas 53066, 53150, 53314, 52803 e 53190, Via da Ftan, Ftan
• Ruben-Rohner Susanne e Chasper, chasa d’affar e d’abitar cun plüssas abitaziuns, parcella 10532, Sent
• Cumün da Scuol, lingia d’aua Brentsch-Tulai, parcellas 631, 632, 732, 895, 896, 898, 1732, 1763, 1593 e 1803, Brentsch, Tulai, Scuol
• Bott Domenic, rimplazzamaint dal s-chodamaint d’öli cun sondas geotermicas, parcella 19019, Sur En, Sent
• Vogg Sebastian e Tobias, sanaziun chasa d’abitar, parcella 50278, Pradatsch 10, Ftan
• Viletta Christina ed Adrian, indriz fotovoltaic vi da la spuonda e lavurs da pittur, parcella 2256, Via da Liuns 750, Scuol
• Filli Dora e Flurin, installaziun fotovoltaica süll’ala tet, parcella 30929, Via da la Staziun, Ardez

Scuol, 12 mai 2026
La suprastanza cumünala

Riassunt dal protocol