Wirtschaftsförderung

La promoziun d'economia es üna plazza da stab chi sviluppa e promouva in prüma lingia la sporta e l'infrastructura turistica in basa cumünala. Il böt principal es da render plü efficiaint e plü effectiv l’ingaschamaint turistic dal cumün, quai i’ls seguaints secturs:

Infrastructura turistica

Id es essenzial per ün cumün turistic d’avair üna bun’infrastructura. La promoziun d’economia s’occupa cun differentas masüras per megliorar l'infrastructura da basa sco eir l'infrastructura turistica.

Trafic public

Ella s’ingascha per exaimpel per ün augmaint da las frequenzas dal trafic public, dimena dals bus locals, bus da skis e bus pendulars («shuttle»). Ella guarda eir cha las lingias turisticas (per exaimpel S-charl e Val Sinestra) mantegnan o augmaintan lur servezzan.

Sendas

In nossa regiun daja sendas da chaminar, sendas d’inviern e sendas da velo. Quistas raits da sendas sun da megliorar tenor bsögn e strategia turistica. La promoziun d'economia propuona masüras per augmantar la qualità da las sendas existentas. Ella fa eir propostas per nouvas sendas e prepara la realisaziun sül livel administrativ (inoltrar la dumonda als differents uffizis etc.).

Nouva infrastructura turistica

La promoziun d’economia sviluppa progets per nouva infrastructura turistica. Chavazzins actuals in quist connex sun: Masterplan Mountainbike, inscenaziun da l’aua minerala, Avegnir Trü, Webcams turisticas ed oter plü.

Sporta turistica da/tras terzs

Firmas, organisaziuns e persunas privatas sviluppan prodots e sportas turisticas in cumün. La promoziun d’economia coordinescha e promouva quai e sustegna uschè l’ingaschamaint turistic dals exponents locals. Ella spordscha eir plattafuormas localas e regiunalas pel barat e’l sustegn dals partenaris turistics.

Evenimaints

Occurrenzas sportivas e culturalas importantas per ün lö turistic. La promoziun d’economia coordinescha, sustegna e pussibiltescha occurrenzas ed evenimaints d’importanza turistica sün livel cumünal. Ella prepara eir decisiuns strategicas davert la promoziun da singuls evenimaints per mans da la suprastanza cumünala. Exaimpels per tals evenimaints: la Coppa mundiala da snowboard e'l Maraton cul bike intuorn il parc naziunal eop.

Progets

La promoziun d'economia spordscha sustegn e cussagliaziun pro singuls progets cun relevanza economica regiunala e cumünala, per exaimpel progets d'hotellaria obain progets in connex cun quartiers da mansteranza.

Strategia turistica, ESTAG

Mincha cumün illa regiun Engiadina Bassa / Val Müstair dispuona d’ün’instituziun chi s’occupa dal svilup turistic sün livel cumünal. Cun reorganisar e megliorar sias structuras turisticas ha surtut il cumün da Scuol dal 2019 la gestiun da Engiadina/Scuol Turissem SA (ESTAG). Quista società d’aczias s’ingascha in prüma lingia pels interess turistics locals e definischa la strategia turistica dal cumün. Ella fa quai in accord culs exponents illas fracziuns e culla strategia regiunala da l’organisaziun turistica TESSVM sco eir cul svilup regiunal.

Scuol, 2020