Unterhalt

 528 bankins daja sül territori dal cumün da Scuol. Els sun da controllar, da spalar oura d'inviern e da controllar da prümavaira. Quai fa il mantegnimaint dal cumün – sper bleras otras lavurs.

Rumir naiv

Amo avant pacas eivnas as vezzaiva dapertuot mantuns da naiv, schlavazzuns e farguns. Rumir naiv süllas vias, sendas e plazzas dal cumün es üna lavur principala dürant l'inviern. Id es d'organisar – bleras jadas a cuorta vista – ils collavuraturs e las maschinas.

Vias in cumün

Las vias patischan dürant l'inviern. Subit cha la naiv es alguada, esa da registrar ils dons, da planisar e d'accumpagnar lavurs. Eir ils mürs, las s-chalas, las saivs e las vascas d'aua meteorica douvran l'attenziun toccanta per cha la sgürezza dal trafic motorisà, dals velos e'ls peduns saja garantida.

Las vias cumünalas han üna lunghezza cumplessiva da var 55 km.

Vias champestras e forestalas

Sün territori dal cumün da Scuol daja var 320 km vias champestras e forestalas. Eir quistas vias – cun punts, mürs, saivs, chünettas e drenaschas – sun da controllar periodicamaing o davo evenimaints extraordinaris.

Sendas

L'Engiadina Bassa es cuntschainta sco paradis per tuot las persunas chi van jent a chaminar. Ella dispuona d'üna rait da sendas per mincha gust e mincha ambiziun. Il stadi da quistas sendas es da controllar regularmaing. Quai vain fat in collavuraziun culla Cumünanza grischuna per sendas (Bündner Wanderwege BAW). Il mantegnimaint dal cumün organisescha lura las lavurs necessarias e fa eir la coordinaziun cun gruppas chi güdan (p. ex. scoulas, protecziun civila).

Plazzas da repos e plazzas da giovar

Diversas plazzas cun bankins e per part föclers invidan a far la posa dürant o davo la spassegiada. Eir quistas plazzas da repos sun da controllar e da mantgnair. Il medem vala pellas plazzas da giovar. La sgürezza dals differents urdegns es fich importanta, perquai vain fatta üna controlla minuziusa mincha prümavaira.

Infrastructura da sport

In nos cumün nu's poja «be» ir culs skis ed a chaminar. Divers implants da sport invidan a movimaint e divertimaint: plazzas da ballapè, plazzas da glatsch, diversas plazzas da sport sper las scoulas, il traget finlandais in Gurlaina a Scuol – eir quists implants sun tuots da controllar, da mantgnair e da pulir.

Auals

La sgürezza es insomma ün tema central pel mantegnimaint, specialmaing eir pro'ls auals. Schi's vezza in ün lö cha l'aua voul ir sur las rivas oura esa da reagir e da far las lavurs necessarias. Eir ils passagis da vias sun adüna d'avair suot ögl.

Funtanas mineralas

Ils inchaschamaints da las funtanas mineralas sun per part sur 100 ons vegls. Il mantegnimaint survaglia, in collavuraziun cul capofuntanas, lur stadi e fa eir lavurs da cuntuorns, impustüt pro las funtanas accessiblas pella generalità.

Bügls

Il capofuntanas guarda cha l'aua sbuorfla our dal chüern. Il mantegnimaint invezza es respunsabel pel bügl sco tal chi po avair sfessas o oters dons. Dal rest: i dà 112 bügls in cumün illas differentas fracziuns e 37 in champogna.

Sunteris

Il mantegnimaint guarda cha las fossas, ils mürs e'ls indrizs sajan in ün bun stadi e cha l'uorden da sunteri vegna respettà. El organisescha e prepara, in collavuraziun cul servezzan d'abitants, las sepultüras. Plünavant maina'l ün register da las fossas.

Plazzas da parcar

Las plazzas da parcar nu sun be da mantgnair, i voul eir la signalisaziun adequata chi'd es da renovar minchatant temp. Plünavant esa da guardar cha las uras da parcar funcziunan.

Immundizchas

Las immundizchas sun chosa da la regiun, per l'infrastructura correspundenta però (moloks etc.) pisseran ils cumüns. Id es dad organisar las controllas e las pulidas da quist'infrastructura. Plünavant esa da coordinar chi chi fa che lavurs (lavuraints cumünals obain la firma Crüzer). Trais cifras: sün territori dal cumün da Scuol daja 25 plazzas da ramassamaint pellas immundizchas, 167 chavognas da palperi e 133 Robidogs.

Deponias

Deponias sun suottamissas a prescripziuns chantunalas e federalas. Ellas sun dimena da survagliar. Plünavant esa d'infuormar a la populaziun a reg. ils temps d'avertüra, il material chi das-cha gnir depuonü e.o.p.

Arrandschamaints

Dürant l'on daja in nos cumün, almain in «temps normals», divers arrandschamaints. Da quels chi's repetan – sco la festa dals 1. avuost o il Bikemaraton – sco eir da quels unics – sco üna festa da musica o ün teater suot tschêl avert. Tals arrandschamaints pretendan ün'infrastructura plü pitschna o plü gronda. Ils lavuraints cumünals portan bancs e maisas, serran vias ed amo bler daplü – e rumischan tuot davo l'arrandschamaint.

Piket

Bleras lavurs as poja planisar. I dà però adüna darcheu eir situaziuns extraordinarias: Strasoras, naiveras, auazuns ed oter plü. Perquai daja il servezzan da piket: ün manader sco eir ün lavuraint per fracziun sun adüna pronts da gnir in acziun la saira, la not, sonda/dumengia e'ls dis da festa.

Pro'l mantegnimaint sun occupadas 22 persunas (21 plazzas cumplainas). Bleras lavurs fan ils lavuraints svess. Els survegnan però eir sustegn da la gestiun forestala dal cumün, impustüt pro la rumida da naiv. Plünavant surdà il cumün lavurs da mantegnimaint a firmas externas, e talas güdan eir cun rumir naiv schi fa dabsögn.

La gestiun dal mantegnimaint es scumpartida in duos parts – quai es indispensabel pro'l cumün culla plü gronda surfatscha in Svizra: la part vest cumpiglia las fracziuns da Tarasp, Ftan, Ardez e Guarda, la part ost las fracziuns da Scuol e Sent. Marz 2021