Diese Informationen und Protokolle gibt es nur in romanischer Sprache. Die Gemeindekanzlei gibt gerne Auskunft.

​

Decisiuns chi pertoccan a persunas privatas o ad affars na amo serrats giò nu vegnan publichadas.
 

Club da golf Vulpera

Daspö il 2018 sustegna il cumün al club da golf Vulpera cun ün import annual dad 11 050 francs (sustegn 10 000 francs e 1 050 francs per la reducziun da la taxa tenor il consüm d’aua).

La suprastanza dal club da golf Vulpera dumonda cun charta dals 9 lügl 2026 per üna prolungaziun da la contribuziun annuala. Grazcha a la calculaziun fich stricta hana pudü realisar i’ls ultims trais ons diversas investiziuns da mantegnimaint importantas: sanaziun dad ün pêr balcuns da partenza, renovaziun da drenaschas e meglioraziun dal sistem da sauaziun.

Malgrà quistas investiziuns restan las sfidas da mantegnimaint grondas. Il cuors da golf es situà in üna cuntrada suottamissa fich ferm a la glüna da l’ora. Mincha prümavaira hana da reparar las sendas chi’s sbassan. Üna gronda sfida es la renovaziun dal sistem da sauaziun i’l parcuors, ün sistem chi funcziuna amo adüna a man e chi chaschuna uschè gronds cuosts.

Grazcha a la lavur cumöna hana pudü tgnair bass las sortidas dürant ils ultims ons.

Adonta da tuot ils sforzs es il club da golf Vulpera avisà sül sustegn finanzial dal cumün da Scuol.

La suprastanza cumünala es da l’avis cha’l parcuors da golf saja üna sporta importanta e decida da sustgnair al Club da golf Vulpera eir dürant ils prossems trais ons (2027 – 2029) cun ün import annual dad 11 050 francs.
 

Boudas in differentas vals

In marcurdi, ils 29 lügl 2026 haja dat las prümas boudas. Illa val Lischana haja sbodà la puntina da la senda e rumi davent il passagi tras il let dal flüm. Implü haja dat ün don pro la lingia da l’aua chi spisgiainta Pradella. Las chasadas da Pradella survegnan causa quai per intant l’aua nan da la sarinera. La lingia ruotta sto gnir missa a dir obain chi sto gnir fat ün nouv trassè.

In Uina, Curtinatsch es la via da god gnüda demolida e’l delta dal material ha spostà ligeramaing la val, ma uschigliö nun haja dat grondas boudas. Pro las gallarias, Val Glatschera e’ls Puntins Ots d’eira tuot in uorden.

Il terz lö chi ha dat boudas d’eira illa part nod da la val S-charl (Plan da Funtanas). Là esa gnü giò var 1 000 m³ material da divers vallangs e fastagls (5 lös). Quai ha pudü gnir rumi ter svelt uschè chi’s ha pudü dar darcheu liber la via in gövgia a mezdi.

Implü esa gnü giò amo üna bouda suot la sarinera d’Ardez.

In venderdi saira, 31 lügl intuorn las 17.00 haja danövmaing dat temporals e quist ha darcheu chaschunà diversas boudas. Pro la val Lischana e Vallorcha nun han quellas però chaschunà ingüns dons. La val Uina as haja sün quai serrà e pro la controlla il di davo as haja vis cha’l tettin pro’ls Puntins Ots es gnü demoli cumplettamaing. Quai vain darcheu miss ad ir prosmamaing. In Uina esa gnü giò material amo in ca. trais oters lös, ma nüglia in lös decisivs obain in quantitats relevantas. Ils gronds dons haja dat illa val S-charl. Pro Plan da Funtanas esa restà quiet. Cumanzà haja a Sasstaglià e Val Chastès. Là d’eira eir serrà aint ün auto e 5 persunas. A las persunas esa stat pussibel da deliberar ter svelt, però cul auto as haja pudü gnir oura pür vers mezzanot. A Munt Rot haja maglià davent ca. 30 meters da la via e stagnà il flüm. A Trigl esa eir gnü giò bler material e là as ha lura eir fuormà ün seguond lai. Quia ha pudü gnir refatta la via provisoricamaing fich svelt. Il grond desaster haja dat pro’l Lavinèr dals Vadès. Là esa gnü giò raduond 50 000 m³ material chi han suoglià la via e’l flüm e fuormà ün terz lai. Per refar quist toc dal traget haja dat fich blera lavur. Las prümas maschinas d’eiran in acziun fingià intuorn las 22.00 ed id es gnü lavurà tras fin il di davo a las 23.00 cun duos gruppas da lavur. Ils prossems 6 dis esa gnü lavurà minchadi da las 06.00 a bunura fin la saira tard a las 23.00. In acziun d’eiran per part fin 6 camiuns, 4 fin 5 baggers e 2 fin 3 dumpers gronds. Cun tuot il material chi’d es gnü giò as haja dozà quel toc traget vers S-charl per raduond 5 m e schlargià la via sün almain 12 m. Cun quai as ha müdà il trassè da la via. Da la vart vers Scuol esa gnü fat cul rest dal material ün deposit da ca. 8 m otezza e 20 m largezza. In marcurdi vers mezdi d’eira lura il flüm darcheu tantinavant liber ed in venderdi as haja pudü finir cullas lavurs. Tuot ils lavuraints han dat tuot e lavurà excellentamaing. Da remarchar es lur flexibiltà da lavurar nots e fins d’eivna e lur disponibilità. Id es gnü prestada üna lavur fich speditiva e grondiusa.

La gövgia, ils 6 avuost haja lura displaschaivelmaing dat danövmaing temporals ed illa val S-charl sun darcheu gnüdas giò quatter boudas in Plan da Funtanas e singulas in Sasstaglià, Val Chastès e Trigl. Venderdi saira, ils 7 avuost ha la via darcheu pudü gnir drivida pel trafic da fin d’eivna. Pels prüms 3 dis da l’eivna seguainta voula amo serradas da la via dürant il di per pudair finir las lavurs a Munt Rot.

Ils dons da las strasoras in S-charl dürant quels dis han chaschunà per intant cuosts da raduond 400 000 fin 500 000 francs.

La suprastanza cumünala ingrazcha fich al manader tecnic sco eir al manader dal mantegnimaint ost per lur lavur ed ingaschamaint per organisar e coordinar tuot las lavurs e pel grond sustegn invers ils lavuraints. Eir ingrazch’la a tuot ils lavuraints chi han prestà üna lavur grondiusa e per lur gronda flexibiltà da lavurar, quai cun dis da lavur fich lungs e dafatta cun servezzans dürant las nots.
 

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Garascha Fratschöl SA, adattamaint da las reclamas iglüminadas, parcella 1225, Via da Manaröl 679, Scuol
• Giston SA, spostamaint da las garaschas existentas, parcellas 30677, 30673, 30672, Pracom 198 E, Ardez
• Pendicularas Scuol SA, infrastructura d’innaiver Champatsch, parcella 3497, Champatsch, Scuol
• Cla Duri Blanke, ingrondimaint dal tet existent vers ost, parcella 53122, Champs / Pradatsch 28, Ftan

Scuol, 25 avuost 2026
La suprastanza cumünala

Riassunt dal protocol