Diese Informationen und Protokolle gibt es nur in romanischer Sprache. Die Gemeindekanzlei gibt gerne Auskunft.

​

Decisiuns chi pertoccan a persunas privatas o ad affars na amo serrats giò nu vegnan publichadas.
 

Revisiun da la ledscha davart las taxas da giasts e las taxas turisticas (LT)

Il cumün da Scuol dispuona d'üna ledscha da taxas da giasts e da turissem (LT) stabilida, la quala es daspö ons üna part importanta per la finanziaziun da prestaziuns e spüertas turisticas. I'ls ons passats s'han però müdadas las cundiziuns da basa i'l turissem essencialmaing.

La suprastanza es da l’avis ch’üna revisiun da la ledscha existenta fa sen. Il böt es da sgürar a lunga vista la finanziaziun dal turissem, da rinforzar la cumpetività da la destinaziun e da metter a disposiziun ils mezs finanzials necessaris per mantegner las prestaziuns existentas sco eir per pudair sviluppar nouvas sportas orientadas vers l'avegnir.

Per elavurar üna revisiun da la ledscha da taxas da giasts e da turissem (LT) vain installada üna gruppa da lavur chi cumpiglia Curdin Thomas, Viktor Glaser e Dillon Rätz.

Scoula Scuol+

La cumischiun da fabrica dal proget scoula Scuol+ ha evaluà ils stüdis surlavurats illa sezzüda dals 27 mai 2026.

Ils stüdis han gnü il böt da sviluppar differentas strategias per realisar il program da spazi ed integrar quel i’ls stabilimaints existents sco eir cun resguardar ün eventual svilup i’l futur.

Per pudair proseguir la planisaziun esa necessari cha la suprastanza definischa la varianta da basa e deliberescha il proget preliminar.

La suprastanza cumünala deliberescha il program da spazi pel stüdi 2.0. Implü decid’la da surdar las lavurs d’architect al büro Balasingam Kunz per l’import da 350 000 francs incl. ipv.

Trü - Plazza da beton, glatsch

La platta da beton vain controllada regularmaing, l’ultima controlla ha muossà cha quella es in ün fich nosch stadi.

Id exista il privel cha cun trafichar la platta da glatsch culla maschina da far glatsch as stordscha la platta da beton chi dà davo plü ferm resp. i'l plü mal eir rumper tras. Perquai nu’s poja respuonder ün ulteriur adöver da la platta.

Il suprastant da dicasteri sport orientescha amo davart üna sezzüda ch’el ha gnü ultimamaing in connex cun quista fatschenda. In quella es gnü discus davart las pussibiltats chi dà per spordscher tuot tenor alch provisoric. Ün glatsch provisoric füss pussibel da realisar cun ün indriz movibel sco quel a la “Quaderwiese” a Cuoira. Quel cuostess raduond 240 000 francs per üna stagiun. L’indriz provisoric gniss installà là ingiò chi’s rechatta la plazza da Beach-Volley causa cha quellas mattas pon gnir plazzadas sün sablun. Ün otra varianta füss da cumprar quellas mattas chi cuostessan bundant ün mez milliun francs. L’avantag da quist indriz es chi’s pudess dovrar quel eir la stà per s-chodar il bogn. Per realisar quai faja tuot tenor dabsögn dad üna surfatscha plü gronda co’l glatsch artificial. Quistas mattas vessan üna dürada da vita tanter 10 e 14 ons. La dürada da la renovaziun da la folia dal bogn chi’d es gnüda fatta avant ün on düra uossa eir amo per ca. 15 ons uschè cha pels prossems 10 fin 15 ons pudess culla varianta da cumprar las mattas amo gnir garantida la gestiun dal Trü. Implü esa però da ponderar ingiò ed in che dimensiuns cha’l glatsch pudess gnir installà definitivamaing, tuot tenor pudess quai eir esser ingiò chi’s rechatta hoz la platta da beton, quia esa da far quint cun cuosts totals da ca. 1.2 milliuns francs.

La suprastanza cumünala decida chi dessan gnir dumandadas offertas per quistas duos variantas. Tuot tenor dessa lura üna radunanza cumünala amo in avuost per avair temp avuonda per pudair esser pronts per la prosma stagiun d’inviern.
 

Termin per las elecziuns cumünalas

Causa cha nossa constituziun cumünala nu lascha pro da far las elecziuns cumünalas eir cul e-voting (ingüna procedura d’annunzcha) esa necessari da far quellas ad ün oter termin co sün ün termin fixà da la Confederaziun. La suprastanza decida cha las elecziuns dessan avair lö als 18 october 2026.

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Erica Koch, nouva suosta vers vest e restoraziun da la fatschada, parcella 10650, Crusch 302, Sent
• Stiftung Bergschule Avrona, nouv ascensur illa chasa da scoula, parcella 20998, Avrona 2-172, Tarasp
• Maria e Peter Kühnis, restructuraziuns dals s-chalins d’entrada e nouv spuonda, parcella 139, Vi, Scuol
• Società simpla «Chasa sur Trü», müdamaint da proget: müdamaints interns, integraziun dal balcun ill’abitaziun vers süd, parcella 1591, Via da Pedra Grossa, Scuol
• Laila e Tiziano Pelli, nouv stabilimaint per velos, parcella 52755, Tanter Auals, Ftan
• Franziska e Nicolà Sarott-Rindlisbacher, nouva chasa d’abitar cun plüssas abitaziuns, garascha suotterrana e fouras geotermicas, parcella 544, Rachögna, Scuol
• Armon Thomas, nouva chadafö ed ascensur da marchanzia, parcella 30966, Fusch 38.1, Ardez
• Sylvia Lörcher e Jörg Mettler, sanaziun e renovaziun da la chasa, parcella 33417, Plazzetta, Ardez
• Katharina Mischol e Matthias Steger, müdamaint d’ütilisaziun dad üna butia as ün cafè e nouva entrada, parcella 201, Stradun 198, Scuol
• Cumün da Scuol, renovaziun da la raboccadüra dal mür da sunteri, parcella 6032, S-charl 55, Scuol
• Gian Eduard Lardi, duos nouvas fanestras illa fatschada vers süd dal tablà e travestida da la fatschada, parcella 10307, Chasellas, Sent

Scuol, 14 lügl 2026
La suprastanza cumünala

Riassunt dal protocol

​