Avertüra cun success dal «Inscunter turissem Scuol»
In venderdi, ils 29 mai 2026, ha gnü lö i'l local da cultura dal Bogn Engiadina il prüm inscunter da rait «Inscunter turissem Scuol».
Avertüra cun success dal «Inscunter turissem Scuol»
In venderdi, ils 29 mai 2026, ha gnü lö i'l local da cultura dal Bogn Engiadina il prüm inscunter da rait «Inscunter turissem Scuol». Il post da coordinaziun turistica dal cumün da Scuol ha pudü salüdar a 27 rapreschantantas e rapreschantants da differents portaders da prestaziuns turisticas. Il böt da l'occurrenza d'eira da promouver il barat a l’intern da la rait turistica e da discuter insembel ideas per sviluppar inavant la sporta turistica a Scuol.
Il cumanzamaint ha fat Martina Melcher, presidenta da la Pro Büvetta Tarasp, cun seis referat «Destinaziun da wellness daspö 1369», i’l qual ella ha muossà che importanza cha las funtanas d'aua minerala han gnü pel svilup turistic da l'Engiadina Bassa e che schanzas chi's muossan per l'avegnir.
In seguit sun gnüts approfundits in lavuratoris ils temas «Gurlaina Pumptrack / plazza da giovar» sco eir «Promoziun d'occurenzas i’l cumün da Scuol». Ils partecipants han contribui lur experienzas, bsögns ed ideas ed han discus insembel pass pel svilup pussibels.
Ils resuns reguard l’inscunter sun stats tras oura positivs. Specialmaing predschats sun gnüts il barat avert e constructiv, la pussibiltà da's colliar cun oters sco eir la diversità da las perspectivas rapreschantadas. Blers partecipants han fat resortir ch'els hajan resenti ils discuors a listess nivel sco eir l'occasiun da far agens giavüschs e da s-chaffir nouvs contacts sco fich prezius.
Eir our dal punct da vista dal post da coordinaziun dal turissem es stat il prüm inscunter da rait ün success. Ils resultats muossan chi exista ün grond interess per ün barat regular e per üna colliaziun plü ferma tanter il differents acturs da la sporta turistica a Scuol. Al listess mumaint sun gnüts ramassadas intimaziuns preziusas per occurrenzas futuras. Giavüschadas vegnan tanter oter amo daplü infuormaziuns davart progets curraints, üna comunicaziun a temp dals temas sco eir discussiuns approfundidas davart singuls accents.
Il post da coordinaziun turistica ingrazcha a tuot ils partecipants per lur ingaschamaint e s'allegra da cuntinuar cul dialog cumanzà. Üna prosma ediziun dal «Inscunter turissem Scuol» es fingià in planisaziun e dess avair lö probabelmaing al cumanzamaint da la stagiun d'inviern.