Exposiziun publica dals 17 da mars 2026 fin il 1. da matg 2026 (il termin è suspendid causa las vacanzas da dretgira dals 18 da december fin cun ils 2 da schaner; 15 da fanadur fin e cun ils 15 d'avust; dal 7 avel di avant Pasca fin e cun il 7 avel di suenter Pasca: segund art. 39 da la lescha davart la giurisdicziun administrativa [LGA; DG 370.100]) tenor ils art. 57 ss. da la Lescha davart il dretg da las auas dal chantun Grischun (LDAG; DG 810.100).

Las Ovras electricas d'Engiadina SA (OEE) dumondan d'approvar il project per sanar il sistem d'aua turbinada Ova Spin – Pradella, ROKS TP4, a las tschiffadas d'aua Clemgia e Sampuoir.

Cun l'inoltraziun dals 3 da mars 2026 vegnan dumandadas tut las permissiuns spezialas necessarias (coordinaziun e concentraziun da las proceduras tenor l'art. 58 LDAG).

La dumonda d'approvaziun dal project menziunà en il titel è exponida publicamain en il center administrativ Sinergia, Ringstrasse 10, 7001 Cuira, sco er en la vischnanca da Scuol. Ils documents stattan ultra da quai er a disposiziun en furma electronica sin la pagina d'internet da l'Uffizi d'energia e da traffic dal Grischun sut la rubrica «Actualitads».

Tgi ch'è pertutgà da l'exposiziun e po far valair in interess degn da vegnir protegì ch'il project vegnia realisà, impedì u midà (art. 57 en cumbinaziun cun l'art. 54 LDAG), ha il dretg da far protesta cunter il project, e quai en scrit e cun ina curta motivaziun. Il dretg da far protesta ha plinavant, tgi ch'è autorisà tenor il dretg federal da far quai.

Las protestas ston vegnir inoltradas entaifer il termin d'exposiziun al Departament d'infrastructura, energia e mobilitad dal Grischun, Ringstrasse 10, 7001 Cuira.