Decisiuns chi pertoccan a persunas privatas o ad affars na amo serrats giò nu vegnan publichadas.
 

Vendita d’immobiglias

La suprastanza vaiva scrit oura la vendita da la parcella 10774 (Duigls, Sent) e la parcella 41453 (Guarda) dals 19 november 2025 fin als 10 schner 2026. Da las offertas entradas ha la suprastanza cumünala decis da vulair vender las duos immobiglia als offerents chi han offri il plü grond import:

Parcella 10774 (Duigls, Sent) a Jon Fadri Carpanetti per l’import da 444 000 francs

Parcella 41543 (Guarda) a Sophie Badel e Felix Hüfner per l’import da 650 000 francs

La suprastanza cumünala deliberescha las duos venditas per mans da la radunanza cumünala.
 

Uffizi da scussiun

Il capo orientescha davart la situaziun dal uffizi da scussiun e fallimaint. Causa mancanza da persunal es l’uffizi da scussiun e fallimaint da la regiun Engiadina Bassa/Val Müstair pel mumaint serrà. Intant maina la regiun Plessur l’uffizi da scussiun e fallimaint per nossa regiun.
 

Chalandamarz a Scuol

Als 30 schner 2026 es entrada üna charta dad Astrid Castellani cul appel da manar tras il Chalandamarz a Scuol als 1. marz e na als 28 favrer. Ella ha ramassà passa 180 suottascripziuns. La suprastanza cumünala orientescha al cussagl da scoula cha la suprastanza sustegna las üsanzas e cha quist saja üna chosa dal cussagl da scoula e las fracziuns. La problematica es cha tenor la ledscha da scoula nu’s poja obliar da far far als uffants robas dürant las vacanzas e quai chaschuna cha genituors chi nu sun creschüts sü cullas üsanzas nu sun pronts da sustgnair quai. Implü esa uschea, cha tenor las gazettas veglias da scoula e tenor discuors cun anteriuras persunas d’instrucziun vain festagià il Chalandamarz fingià daspö divers decennis a Scuol, Sent e Tarasp il di avant ils 1. marz scha quel es üna dumengia. Il motiv oriund per quist’excepziun d’eira, tenor infuormaziuns chi’s ha surgni, chi nu’s laiva far il cortegi da Chalandamarz al listess mumaint sco il cult divin in baselgia.
 

Permiss da fabrica gnüts concess da la direcziun

La direcziun resp. la suprastanza han concess ils seguaints permiss da fabrica:

• Murièle Seraina Hüberli, nouva chasa d’abitar cun sondas geotermicas, adattaziun da la lobgia e nouva fanestra illa chasa, parcella nr. 1891, Crastuoglia Sura, Scuol
• Nicola Küpfer Caminada, sanaziun dal tet, parcella nr. 50145, Rontsch 86, Ftan
• Cumün da Scuol, nouv implant da ramassamaint d’immundizchas suotterran, parcellas nr. 632 e 1763, Brentsch, Scuol
   

Scuol, 19 favrer 2026
La suprastanza cumünala

Riassunt dal protocol