Nom / vopna

Il nom Scuol

La ragisch da quist nom es – cun fich gronda probabiltà – il pled latin "scopulus", quai voul dir "spelm" o "grip" (tudais-ch "Klippe"). Quista derivanza es plausibla impustüt schi's resguarda la posiziun da la baselgia sün ün grip marcant sur la riva da l'En. Il grip sunteri ha dimena dat il nom a tuot il cumün.

Il nom ufficial dal cumün es stat fin aint pel 20avel tschientiner Schuls resp. Scuol/Schuls. Dal 1969 ha decis la radunanza cumünala da dovrar be plü il nom Scuol. Schuls es però derasà amo adüna, forsa cun quai cha'l cumün es gnü cuntschaint cun quist nom sco lö da cura.

 

La vopna da l'anteriur cumün da Scuol *

Descripziun: Funtana sigliainta cun coppa naira e quatter fils d'aua da culur blaua ed alba.

Motivaziun: La vopna simbolisescha la reputaziun dal cumün sco lö da bogns. Ils quatter fils d'aua rapreschaintan la richezza e varietà da las funtanas mineralas: las "auas da sal" e'ls geisirs da Nairs, las auas fortas da Scuol e la "funtana amara" da Lischana.

Culuors dal cumün: nair-gelg-blau

* Quista vopna vain dovrada eir pel cumün fusiunà fin cha la nouva vopna es avant man.