Bainvgnü

Ün cordial bainvgnü a Scuol

Scuol es il center economic ed administrativ da la regiun. Differents uffizis chantunals han quia ün sez. A Scuol as rechatta eir ün studio regiunal da la RTR (Radiotelevisiun Svizra Rumantscha). L'Ospidal d'Engiadina Bassa e plüssas pratchas da meidis garantischan il provedimaint da sandà da tuot la regiun. Grossists ed affars specials spordschan tuot il necessari pel minchadi e daplü.

Dürant la seguonda mità dal 19avel e la prüma mità dal 20avel tschientiner d'eira Scuol – insembel cun Vulpera-Tarasp – ün lö da cura fich renomnà. Scuol ha fat reviver quista tradiziun in üna fuorma moderna cun fabrichar il Bogn Engiadina Scuol chi cumpiglia eir ün center da terapia.