Energiestadt Scuol


Novitats da la Cità d'energia

Daspö ils 19 october 2018 es il cumün da Scuol Cità d'energia. El s'ha oblià cun quist label per üna politica d'energia ecologica e prevezza perquai diversas masüras in differents secturs. Sün quista pagina as chatta actualitats in quist connex, cul temp però eir tips per spargnar energia ed oter plü.

Cussagliaziun energetica per patruns da fabrica e proprietaris da chasas

Il cumün spordscha a seis abitants ün servezzan da cussagliaziun energetica cul böt da sbassar il consüm d'energia dals stabilimaints in cumün a vista mezdana ed a lunga vista. Il cusgliader dal cumün da Scuol es Jon Armon Strimer, architect e specialist per dumondas energeticas. El es neutral, quai voul dir ch'el nu profita scha'l patrun da fabrica realisescha las masüras arcumandadas.

La prüma cussagliaziun paja il cumün. El voul simplifichar cun quai l'access a masüras per optimar l'efficienza energetica da stabilimaints. Quista prüma cussagliaziun, ün uschedit  «Gebäudecheck», dimena ünaprüma examinaziun dal stabilimaint, succeda per regla al lö. Ella cumpiglia propostas chi pertoccan ils mürs e las paraids sco eir la tecnica da chasa, implü daja tips per spargnar energia e cussagls per la realisaziun.

Ils cuosts per eventualas ulteriuras cussagliaziuns surpiglian las persunas chi tscherchan cussagl. 

Infuormaziuns davart la cuassagliaziun energetica as chatta sülla pagina d'internet dal cusgliader energetic, Jon Armon Strimer. Ils termins sun da cumbinar directamaing cun el (datas da contact vair suotvart).

Eir il Chantun spordscha a patruns da fabrica e planisaders üna cussagliaziun energetica gratuita. Suot il link correspundent as rechattan eir divers fögls d'infuormaziun. L'uffizi d'energia e da trafic dà infuormaziuns per telefon (081 257 36 30) obain persunalmaing pro l'uffizi a Cuoira, Rohanstrasse 5 (termins tenor cunvegna). 

Cusgliader energetic dal cumün da Scuol
Jon Armon Strimer, architect dipl. FH/SIA
STRIMER architects SA
7546 Ardez
Telefon 081 862 22 22
info(at)strimersa.ch
www.strimersa.ch

 

Cità d'energia Scuol

(link per la pagina da l'organisaziun Energiestadt)