Permiss d'ustaria

Per manar ün'ustaria (eir temporarmaing, p. ex. dürant ün arrandschamaint d'üna società) as douvra ün permiss. Per far la dumonda sun da resguardar ils artichels 2 e 3 da la ledscha cumünala d'ustaria:

La dumonda per la concessiun d’ün permiss tenor l’artichel 3 alinea 1 LU (ledscha d’ustaria pel chantun Grischun dals 7 gün 1998) es d’inoltrar a la suprastanza cumünala almain ün mais avant co rivir o surtour üna gestiun o avant l'occurrenza.

La dumonda sto cuntgnair las seguaintas indicaziuns:

Dumonda per manar ün'ustaria

  1. las persunalias e l’adressa da la persuna chi sarà la titulara dal permiss
  2. la determinaziun exacta da la gestiun
  3. la determinaziun exacta d’eventualas gestiuns secundaras
  4. la dürada (pro permiss limitats)

A la dumonda sun d’agiundscher:

  • ün extrat dal register penal (na per singuls arrandschamaints)
  • la conferma suottascritta cun agen man d'avair tut cugnuschentscha da las disposiziuns respectivas

Dumonda per ün'ustaria occasiunala o da festa

  1. las persunalias e l'adressa da la persuna chi sarà la titulara dal permiss
  2. la determinaziun precisa da l'arrandschamaint
  3. l'infuormaziun schi vegnan vendüdas bavrondas destilladas (scha quai es il cas es da dumandar ün permiss chantunal tenor art. 12 ss. LU)
  4. cumanzamaint e fin da l'arrandschamaint

 

 

Infuormaziuns davart l'extrat dal register penal