Nom
Il nom Scuol
Fingià illa documainta fich veglia as chatta il nom cun differents möds da scriver, p.ex. Schulle, Sculla, Schulis e Sculle.
Andrea Schorta, l'autur dal cudesch da noms retic es da l'avis cha'l nom Scuol deriva dal pled latin scopulus, quai voul dir spelm o grip (tudais-ch "Klippe"). La situaziun da Scuol Sot ed impustüt da la baselgia conferma quista ipotesa, uschè chi's po dir: il grip sunteri ha dat il nom a tuot il cumün.
Il nom ufficial dal cumün es stat fin aint pel 20avel tschientiner "Schuls" resp. "Scuol/Schuls". Dal 1969 ha decis la radunanza cumünala da dovrar be plü il nom "Scuol". "Schuls" es però amo adüna derasà ferm, forsa cun quai cha'l cumün es gnü cuntschaint sco lö da cura cun quist nom.