Bainvgnü
Ün cordial bainvgnü a Scuol!
I'm fa plaschair cha El/Ella fa üna visita sülla pagina d'internet dal cumün da Scuol!
Scuol es la chapitala da l’Engiadina Bassa ed accumplischa varsaquantas funcziuns per tuot la regiun. Da manzunar sun il Center da sandà cul Ospidal districtual, il Bogn Engiadina Scuol e'l Fliamaint chasan, la Dmura d’attempats Puntota e la Pro Engiadina Bassa sco organisaziun da tet dals cumüns. Differents uffizis chantunals han ün sez a Scuol, sco l’Uffizi da stima, il servezzan social, l’Avuadia ufficiala, l’Uffizi districtual da construcziun bassa, la cussagliaziun professiunala, la pulizia chantunala. La Radiotelevisiun Rumantscha maina a Scuol ün studio regiunal. Scuol es eir ün center da commerzi e mansteranza, da maniera cha bleras interpraisas han lur sez quia.
Grazcha a sia infrastructura cumplessiva es Scuol eir il center turistic. Da nomnar sun quia il Bogn Engiadina Scuol, il territori da skis da Motta Naluns, il bogn avert e cuernà, il center da sport Gurlaina (culla halla da glatsch, la plazza da tennis e la plazza da ballapè) ed il glatsch artificial e natüral in Trü. Illa val principala ed illa Val S-charl daja numerusas sendas per chaminar, la chamonna Lischana dal CAS es ün lö retscherchà per pernottar in muntogna, e culla Val Mingèr fa Scuol part dal Parc naziunal svizzer.
Grazcha a las bundant 20 funtanas d’aua minerala chi sbuorflan illa regiun d’eira Scuol cuntschaint fingià avant tschientiners. Amo hoz as poja retrar gratuitamaing aua minerala pro’l bügl. Perquai nu daja neir da buonder cha la vopna da Scuol muossa üna funtana sagliainta. Üna tala funtana imbellischa daspö ün pêr ons la rondella a l'entrada dal cumün.
Scuol es ün cumün chi viva, quai muossan fingià las numerusas societats. Scuol ha eir mantgnü il caracter d'ün cumün rumantsch e – adonta dal svilup economic ed architectonic dals ultims decennis – las zonas dal cumün vegl cullas chasas engiadinaisas. Uschè s'inscuntran in nos cumün ils tschientiners passats e'l temp modern.
dr. Jon Domenic Parolini
capo cumünal